Ei fredeleg ferd langs verna vassdrag, fossar og ein stille fjordarm. Vegen går langs ein arm av verdas lengste fjord, Sognefjorden, før den smyg seg opp dei bratte dalsidene mot fjellet. Vegen vidare følgjer det verna Gaularvassdraget som er kjent for sine mange fossefall, men som også har stryk og rolege fjellvatn.

Langs delar av vassdraget er det bygd fossesti for å gjere dei sjåverdige partia meir tilgjengelege. Her kan barn og vaksne oppleve aurefiske på sitt beste og vandre på fine stiar langs fossar og stryk. Her er det også tilbod om båtutleige og gode tilhøve for dei som likar å vandre i fjellet. Frå turiststaden Balestrand er det gode høve til å ta avstikkarar, og ein fin måte å oppleve naturen på er båtturen inn til Fjærland og bremuseet der. 

Nasjonal turistveg Gaularfjellet mellom Balestrand - Eldalsosen - Moskog og Eldalsosen og Sande er 130 kilometer lang.

Strekninga mellom Mel og Mjell på Gaularfjellet er vinterstengt.

Informasjon om Nasjonal turistveg Gaularfjellet, pdf for nedlasting.