På denne reisa med lange ferdselstradisjonar mellom aust og vest, køyrer du over Nord-Europas høgaste fjellovergang på 1434 meter over havet. Sognefjellsvegen går frå frodige kulturlandskap i Bøverdalen i aust, via høgfjellsplatået med vidsyn til isbrear og mektige fjell, ned igjen gjennom dalar til det inste av Sognefjorden og stille bygder i vest. Vegen over Noregs tak byr ikkje berre på fjell, men også fjord og dal, og eit landskap fullt av kulturminner.

Lom stavkyrkje er eit av mange høgdepunkt på turen. Vegen var i gamle dagar ei viktig ferdselsåre mellom kysten og innlandet. Salt og fisk vart frakta austover, medan smør, tjøre og skinn gikk vestover. Frå gammalt av var det lurt av bønder og kjøpmenn å halde saman på turen over fjellet for ikkje å bli rana av fantar. I dag er det trygt å ferdast over fjellet, og spenninga langs vegen ligg no i møtet mellom storslått høgfjellsnatur, kunst og arkitektur.

Nasjonal turistveg Sognefjellet går mellom Lom og Gaupne og er 108 km lang.

Vegen over fjellet er vinterstengt, og tidleg i mai kan du oppleve opptil 10 meter høge brøytekantar.

Informasjon om Nasjonal turistveg Sognefjellet, pdf for nedlasting.