Staten vegvesen søkjer entreprenør til fase tre i utviklinga av attraksjonen Vøringsfossen

Statens vegvesen ønskjer tilbod frå entreprenørar med det faglege, tekniske og økonomiske grunnlaget som må til for å gjennomføre tredje etappe av ikonpunktet Vøringsfossen langs Nasjonal turistveg Hardangervidda.

Arbeidet omfattar bygging av utsiktspunkt og andre konstruksjonar som trapper, terrasser og klopper i stål og betong, terrengtilpassa stiar sikra med rekkverk i utsette område, landskapsarbeid og fjellsikring.

Gjenståande arbeid gjeld området vest for fossen. Foto: Carl-Viggo Hølmebakk Arkitektkontor

Entreprisen sitt største element er «hovudutsiktspunkt Fossatromma», ei plattform i stål som kragar ca. 7 meter ut over juvkanten med utsikt mot Vøringsfossen. Entrepriseområdet strekker seg ca. 400 meter langs kanten av Måbødalen.

Her får publikum svimlande utsikt tett på juvkanten. Illustrasjon: Carl-Viggo Hølmebakk Arkitektkontor

Nasjonale turistvegar sitt prosjekt på Vøringsfossen har vore under bygging sidan 2015. Prosjektet omfattar bygging av utsiktspunkt, serviceanlegg, stiar, sikring og bru over elva Bjoreio. Byggetrinn 1 Fossli og byggetrinn 2 Trappebrua blei fullført i 2018 og 2020.

Dei fullførte delane av prosjektet dannar eit godt referansegrunnlag for Fase 3 og tilbydarar oppfordrast til å gjere seg godt kjente med desse. Nytt toalett på Fossetromma vil bli lyst ut som eigen entreprise.

Arkitekt: Carl-Viggo Hølmebakk

For meir informasjon kontakt prosjektleiar Kjersti Wold: kjersti@drivprosjektstyring.no