Turistvegsatsinga på Vøringsfossen
Consolvo har signert kontrakten og våren 2019 vil bygginga av «Hølmebakkbrua» over elva Bjøroa oppstraums den velkjente Vøringsfossen vera i gang. Fundamenteringa med tilhøyrande fjellsikring blei gjort allereie sommaren og hausten 2018.
Utviklinga av reiselivsikonet Vøringsfossen, langs Nasjonal turistveg Hardangervidda, skjer steg for steg og på ein slik måte at turistane og reiselivsnæringane får glede og nytte av etappane etter kvart som dei står ferdige. Første byggetrinn ved Fossli hotell, med sine utsiktsplattformar, stiar, trapper, gjerde, ny parkering og toalettbygg, blei fullført til turistsesongen 2018. I løpet av 2020 vil trappebrua vera den neste som er klar til bruk.
Trappebrua med ei spennvidde på 47 meter, høgdeforskjell på 16 meter og 99 trappetrinn er utbygginga sitt mest spektakulære element. Brua knyter saman Fossatromma og Fossli og blir ein del av vandringa langs kanten av det mektige landskapsrommet ved inngangen til Måbødalen. Anlegget omfattar også nødvendige tilkomstar samt sikring og utbetring av den gamle kløvvegen til Fossli hotell.
Tredje etappe i foredlinga av reiselivsikonet er hovudutsiktspunktet mot Vøringsfossen med tilhøyrande stiar på Fossetromma. Her har ein nødvendige avtalar om tilgang til grunn som gjer at arbeidet kan gjennomførast innan 2021. Deretter kjem nytt toalett og sikring av kanten ved dagens kafè på Tromma, noko som først er aktuelt ved at det offentlege blir eigar av areala gjennom ein formell skjønnsprosess. Som femte trinn kan kafèbygget på Tromma bytast ut dersom finansieringa fell på plass. Målet for turistvegsatsinga er at alt dette skal vera fullført i løpet av 2023. Etter den tid kan det vera aktuelt også å få løfta kvaliteten på utsiktspunktet langs gamlevegen nedanfor Tromma dersom det ligg til rette for det. Arkitekt: Carl Viggo Hølmebakk AS Arkitektkontor
