I gang med Vøringsfossen og Gjende
Ti spektakulære natur- og kulturattraksjonar får sitt løft gjennom satsinga på Nasjonale turistvegar. Seks av dei er gjennomført. No er det opplevinga av Vøringsfossen og Gjende som skal foredlast.
VØRINGSFOSSEN. Aust går over til vest og Hardangervidda blir til Måbødalen. Der stadfestar Vøringsfossen inngangen til vestlandet med eit
totalt fall på 182 meter. Vassdraget er regulert, men med ei sommarvassføring på 11,5 kubikkmeter i sekundet er fossen framleis
ein av dei mest besøkte naturattraksjonane i landet.
Det første byggetrinnet på Vøringsfossen får si offisielle opning juli 2018. Dei besøkande vil få ei luftig og sikker oppleving
av fossen, dalen og den storslagne starten på dei vestlandske fjordane. Fossli hotell får ein komplett attraksjon rett utanfor
døra og reiselivet ein spennande attraksjon til bruk i planlegginga av rundreiser og marknadsføringa av reisemålet Noreg både
her heime og internasjonalt.
2018 blir også startåret for den spektakulære trappebrua som skal binda Fossli og Fossetromma (aust og vest) saman. Brua ligg
oppstraums fossen og vil få tilkomst via utbetra kløvsti og ny tilkomstveg. Dette andre byggetrinnet skal stå klart til bruk
til sommarsesongen 2020.
GJENDE. Gjende er ein av innfallsportane til Jotunheimen og ein viktig fjellterminal der bilveg og stiar møter Gjendebåten og DNT-hytta
Gjendesheim. I dag er utsynet mot Gjendevatnet fylt av parkerte bilar på dominerande parkeringsplassar. Gjennom turistvegsatsinga
skal naturopplevinga få att overtaket. All gjesteparkering skal flyttast til utvida parkeringsplass ved Reinsvangen like ved
fylkesveg 51. Her skal det byggjast nytt toalett. Ny brygge med tilhøyrande bryggehus skal betra tilhøva for Gjendebåten.
Arbeidet med brygge og parkeringsplass starta hausten 2017. I starten av 2018 blir bryggehuset og toalettet lyst ut på konkurranse
med sikte på at alt dette skal vera klart til sesongen 2019. Innan 2020 skal også ei gangbru over Sjoa med tilhøyrande sti
og parkeringsplass for dei som har rettar i området vera på plass. Siste byggetrinn er nytt servicebygg med kafe/kiosk og
toalett som skal stå ferdig 2022/2023.
VØRINGSFOSSEN
Arkitekt: Carl-Viggo Hølmebakk
Byggherre: Statens vegvesen, Turistvegseksjonen
Hovedentreprenør: Mesta AS
GJENDE
Arkitekt: Knut Hjeltnes, Sivilarkitekter MNAL
Byggherre: Statens vegvesen, Turistvegseksjonen
Hovedentreprenør første kontrakt: Brun bygg
