Offisiell opning av Ørteren og Vardestopp langs Nasjonal turistveg Hardangervidda
Torsdag 12. juni opnar to nye rasteplassar på Hardangervidda. Sigrid Simensen Ilsøy, ordførar i Hol kommune står for den offisielle opninga.
Langs rv. 7 i Hol kommune i Buskerud fylke ligg rasteplassane Vardestopp og Ørteren vakkert til med god sikt mot Hardangerjøkulen på klarvêrdagar. Dei to plassane utforma av landskapsarkitektane Bjørbekk & Lindheim har no fått sitt nødvendige løft til glede for vegfarande turistar over Hardangervidda.
Henta frå former i landskapet
-Rasteplassane Vardestopp og Ørteren er utforma etter same lest i eit forsiktig og lågmælt uttrykk med mottoet «LA VERE» som utgangspunkt, det vil seie at anlegga er laga med så små inngrep i naturen som mogleg, fortel landskapsarkitekt Nuno Almeida i Bjørbekk og Lindheim Landskapsarkitekter MNLA.
Idegrunnlaget for sjølve utforminga av rasteplassane er henta frå former i landskapet og frå tradisjonell og stadtypisk kunst og kultur. Det berande elementet i konseptet er ein «Krage» med inspirasjon frå gamal bondekultur og Hardangersaum.
-Betongkragen er rettlinja og stram inn mot veganlegget, og buktar seg i ei organisk mjuk linje ut mot det naturlege landskapet og skaper varierte og unike små tilhaldsstader, seier han.
Vann designkonkurransen
Statens vegvesen gjennomførte ein avgrensa plan- og designkonkurranse for tre rasteplassar langs Nasjonal turistveg Hardangervidda i 2021. Bjørbekk & Lindheim vann konkurransen med konseptet «LA VERE»
Ifølgje juryen hadde vinnarkonseptet «LA VERE» den rette forståinga av og respekten for det særeigne landskapet på Hardangervidda. Landskapsarkitektane minte om at urørd natur er under sterkt press og at det ikkje er meir villmark å miste.
Nasjonale turistvegar
I juni 2025 er det 32 år sidan Stortingets oppfordring om å sjå nærmare på kombinasjonen veg og reiseliv for å styrke Norge som reisemål. Dette blei starten på ei målretta satsing på Nasjonale turistvegar med Statens vegvesen i førarsetet.
Resultatet er ein attraksjon med internasjonal appell. Langs 18 Nasjonale turistvegar frå Jæren i sør til Varanger i nord, får dei vegfarande gode naturopplevingar av kyst, fjell, fjord og foss forsterka med nyskapande arkitektur og tankevekkande kunst på tilrettelagte utsiktspunkt og rasteplassar.
Landskapsarkitekt: Bjørbekk & Lindheim AS
Entreprenør: GTS AS
Byggherre: Statens vegvesen
Fullført: 2025